Startseite » Platt » De Aalbek

De Aalbek mit Boot
De Aalbek mit Boot

De Aalbek

Bither kenn ik vun de Aalbek blots de Münnung.

De Haben vun Niendörp bi Regen
De Haben vun Niendörp bi Regen

De Aalbek is en Bek, en lütt Water, dat in Ostholsteen bi Niendörp in de Oostsee löppt. Se hett al oftins vun sik snacken maakt, besünners in dat letzt Winterhalvjohr. Veel Regen harr dat geven un de leet de Aalbek överlopen. De Wischen neven de Aalbek sehgen enen See liek. De Vagelpark weer bedroht vun dat vele Water. Dat Water kunn nich aflopen, de Oostsee harr Hochwater.

De bövere Aalbek
De bövere Aalbek

Dat harr mi neeschierig maakt. Ik wull nu weten, nehm de Aalbek herkeem. Landkorten, ole Wanderkorten un anner Korten müssen herhollen. Aver narms weer de Loop vun de Aalbek richtig to finnen. De Aalbek weer bannig lütt. Mit den Finger up de Landkort bün ik vun Niendörp in de Gegenricht föhrt. Aver ahn Erfolg. Denn keem ik up de Idee, mi Hölp in dat Rathuus vun Ratekau to halen.

Kark vun Ratekau
Kark vun Ratekau

Dor hüng en grote Landschopskort an de Wand. Up de heff ik de Aalbek funnen: Se keem ut dat Ratekauer Moor. Un dat geev nich blots een, nee, dat geev en bövere Aalbek un noch annere Tooflüss.

Aalbek-Landschap
Aalbek-Landschap

Dor weer ok en Fischdiek entstahn. Den söchen de Angler geern up. De bövere Aalbek leep in den Ruppersdörper See. Leep dor an de nördliche Kant vun den See na Oosten un sorg för frisches Water.

Angler an'n Fischdiek
Angler an’n Fischdiek

Nu wull ik natüürlich mehr över den Ruppersdörper See weten. De weer up mien Wanderkort as Natuurschutz-Rebeet uttekent.

De Aalbekgraven na den See
De Aalbekgraven na den See
Buernhoff Nord-Oost vun'n Ruppersdörper See
Buernhoff Nord-Oost vun’n Ruppersdörper See

Den Ruppersdörper Weg vun Ratekau na Grot Timmendörp weer ik al oftins mit Auto föhrt. Dor weer mi al dat archäologische Schild upfullen.

archäologische Schild
archäologische Schild

Up de lütte Insel in den See, de hüüt noch exesteer, sull fröher en höltern Borg, en so nöömte Motte, stahn hebben. To de Tiet weer de See vermoort, man kunn tofoot na de Borg kamen. Eerst later wöör de See wedder anstaut. Dat kunn man ok up dat Schild nalesen. Vun de Borg weer nix mehr to sehn. Aver de Insel in den See weer noch door. Aanten, Graugöös, Swaans un anner Watervagels swommen üm de Insel. För vele Watervagels weer de Ruppersdörfer See dat Winterquarteer. Överall up de angrenzenden Wischen lepen Graugöös.

De linke ...
De linke …
... un de rechte Hälft vun de Insel
… un de rechte Hälft vun de Insel
De ganze Insel in'n Winter
De ganze Insel in’n Winter

De See liggt noordööstlich vun Ratekau dicht bi Ruppersdörp in Oostholsteen. Vun Ratekau güng en Wanderweg an de Oostsied vun den See na Ruppersdörp. Meist vun överall weer de ole Ratekauer Feldsteenkirch to sehn. Dorüm heet de See ok Ratekauer See.

Ratekau
Ratekau

De See is ca. 25 Hektar groot un is mit 1 bit 2,5 m bannig flach. Watertoloop hett he vun de Aalbek. Dat langt aver nich ümmer för dat Spölen vun dat Water. De Graugöös laat so veel Koot trüüch, dat an hitte Daag in de Sommermaanden Gase ut dat Water upstiegt.

Ratekauer Kark vun de Aalbek
Ratekauer Kark vun de Aalbek

De See steiht ünner Natuurschutz, dor dörf nich angelt warrn un ok nich baadt. Boote hebbt up den benaverten Hemmelsdörper See noog Platz. Blots wenn de Ruppersdörper See en Iesdeek hett, dörf man up em mit Strietschooh lopen.

De Graugöös maakt den Affloog
De Graugöös maakt den Affloog
Graugöös up de Wischen
Graugöös up de Wischen

Ümmer noch gell mien Upmarken de Aalbek. Fröher hett se sik seker dörch de Natuur na den Hemmelsdörper See un wieder na de Oostsee slängelt. Aver denn wöörn Straten un Iesenbahndämme buut. De Aalbek stöör. Se wöör in Rohre ünner de Buuwarke dörch lenkt. Amenn kümmt se hüütigendags so över den Hemmelsdörper See na de Oostsee.

Hemmelsdörper See, Blick na Niendörp
Hemmelsdörper See, Blick na Niendörp

Vun Antje Heßler

Unser Travemünde Heft 1/39

zurück zur Übersichtsseite Platt