476 Johr Holtpantüffelgymnasium

Meist nich to glöven, vör 476 Johr is al en School in Tramünn inricht worrn. 1531 hett Bugenhagen mit de Reformation för Lübeck un Tramünn en nie Kirchenordnung bröcht. In de weer fastleggt, dat in Tramünn ene School in Gang bröcht warrn süll. Na oll Schrievwark is de School wohrhaftig 1531 inricht worrn. Se is en vun de öllsten Scholen in Düütschland.

Egentlich weer datt ja en Grund weest, in’t verleden Johr, dat 475 jährig Bestah’n vun de School to fiern. As dat schient, is dor wohl nüms ener över fullen, oder man wull nich fiern. Nu warrt dat woll duern mit dat Fiern bit de School 500 Johr oolt warrt.

„Höltentüffelgymnasium“ dat höört sik meist so’n beten spöötsch an. De Ökelnaam is wohrschienlich in Noottieden upkamen. Een weet, wenn en Ökelnaam dor is, denn höllt he sik as so’n Klett. Na Vertellen vun de Olen sünd fröher un besonners in de Tieden üm den 1. un 2. Weltkrieg en Barg Kinner up Holtpantüffel na de School gah’n. Welk Kinner sünd sogoor barfoot lopen. Dat hett de Bildhauer Prüßing up en Relief mit de beiden Kinner fasthollen. Dat Bild hängt över den Schoolingang in de Kirchenstraat. He sülven is ok Schöler in de Tramünner School weest. As man annehmen kann, hett he mit dat schöne Relief ut Ekenholt de School enen blievenden Dank afstatten wullt.

Dat man de School dormals grünnt hett is en Segen. Vele Generationen vun Kinner hebbt dörch se dat Rüsttüüg för dat latere Leven kregen. De een mehr, de anner weniger. Graad as se in de Laag un anstellig weren allens uptonehmen.

Männich Schoolmesters hebbt naeenanner mehrere Generationen vun Schoolkinner ut en un de sülve Familie ünnerricht. De Schoolkinner harrn bald dat Gespüür welk Lehrers sik dörch ehr Oort un Wies, woans se den Ünnericht hollen hebbt, Respekt erwarven deen. Meisttiet hett sik dat ok dörch Ökelnaams kunddaan, de de Schoolkinner för männich Lehrers paraat harrn. Nur wenig Lehrers harrn kenen Ökelnamen. Dat tüüg mehrstendeels vun groot Achtung un Verehrung. De Lehrers weren beleevt un harrn bi de Kinner en Steen in’t Brett.

Ik för mien Deel heff goot de Hälft vun mien Schooltiet in dat Tramünner Holzpantüffelgymnasium tobröcht. Ik heff dorbi dat Glück hat, meist gode Lehrers to hebben. För dat Rüsttüüg, wat ik dor mitkregen heff, bün ik hüüt noch dankbor. Ik hööp, dat de hüdigen Schoolkinner genau so goot ehr Rüsttüüg vermiddelt kriegt, as to uns Tieden. Trotz all de Reformen un Ümkrempelien un den niemoodschen Kraam den de Scholen över sik ergahen laten mütt. Ok hööp ik, dat de School later ehren 500. Boortsdag in Ehren fiern warrt. Ik meen, dat hett se verdeent.

Rolf Schwippert
Unser Travemünde, 2007, Heft 2/331

zurück zur Übersichtsseite Platt