Startseite » Platt » Platt De Bloom vun uns Johr!

Schlüsselblume - Pflücken verboten

De Bloom vun uns Johr!

Dit Johr hett de Loki-Schmidt-Stiftung as Bloom vun dat Johr 2016 de Wiesen-Slötelbloom utsöcht. Se tellt to de Primelplanten. De Naam kümmt seker vun dat Utsehn. De Blötenstand süht doch meist en Slötelbund liek. As Kinner hebbt wi ümmer meent, dat man dormit den Heven upsluten kunn. Denn kunn endlich de Lent kamen. De Bloom hett ok noch den Naam Himmelsslötel.

Mit de smucke gele Farv vun ehr Blöden strahlt se ut dat dröge Gras un ut de Büsch. De Bloom is so bescheiden. Se bruukt dröge un kalkhaltige Wischen. Dörch de Kultivierung vun uns Minschen is se besünners in Norden al meist verdreven. Dorüm steiht se ünner strengen Natuurschutz.

Schlüsselblumen

Körtens heff ik veele Slötelbloom an enen Hang mit Gestrüpp sehn. Dat weer utrekend de Hang vun den Sehnsuchtsbarg in’n Klützer Winkel. Ik müss mi dull beherrschen. To geern harr ik en poor Blomen afplückt un mit na Huus nahmen. De satte gele Farv lüüch in’n Sünnenschien.

Ik heff aver doch welk mitnahmen. Ik harr doch mien Knipskassen mit. En poor schöne Biller weern dorbi. Över mien PC hang ik mi en Bild up.

Text und Fotos: Antje Heßler
Unser Travemünde, 2016, Heft 3/367

zurück zur Übersichtsseite Platt