De ole Vogtei in Tramünn
LEVEN WI DE OLEN VÖGTE
Vun Antje Heßler
Leven wi de olen Vögte, dat hett sik de Mann, de nu de Vogtei siet 2005 sien Egen nennt, as Vörbild nahm.
Dat Backsteenhuus mit den Treppengevel is en vun de öllsten Hüüs in Tramünn. De eersten erhollenen Muuern sünd ut dat fröhe Mittelöller. To de Tiet weer Plattdüütsch de Amtsspraak in de Hansestadt Lübeck.
Na en groten Brand is de Vogtei 1551 wedder upbuut woorn. 1599 keem noch en Anbu dorto.
Bi de Renoveerungsarbeiden sünd 2005 in den wunnerbore Deckenmalereen to’n Vörschien kamen, luder Kasetten mit Biller vun römische Kaiser. In en Kasett is de lübsche Adler mit dat Johr 1623 to sehn. Solch goot erhollen Malereen sünd in Sleswig-Holsteen eenmalig.
Düsse Funde hebbt de Vogtei ut Tramünn in de Reeg vun de historischen Hüüs in Lübeck stellt, de sünd vun de UNESCO to’n Weltkulturaav erklärt woorn.
Bit 2002 weer in de Vogtei noch dat Polizeirevier ünnerbröcht.
De Vögte in de Lüttstäder harrn in’t Mittelöller för Ordnung to sorgen. In de Tramünner Vogtei hebbt lübsche Vögte Recht spraken un ehr Regiment föhrt. Se harrn ok noch de Opsicht över den Haven un de Lotsen.
De harrn för de Sekerheit up de Trav to sorgen. Vitalienbröder dreven ehr Unwesen. Vör de Infohrt vun de Trav müssen sik de Scheep to erkennen geven.
Bi Nacht wöör de Infohrt dörch grote Bööm afsparrt. De hett man quer över de Trav trocken. Vör de Sekerheit vun Lübeck wöör in Tramünn noch en Zitadell buut. Likers is dat passert, dat russische Scheep oh’n Holt bit vör de Stadtmuer vun Lübeck kemen.
De Begevenheit kann man in Böker över lübsche Geschicht nalesen. De Vogt weer storven un sien Stell noch nich wedder besett as de russischen Scheep vör Tramünn ankemen.
De Hauptmann vun de Zitadell weer nich tostännig, dat weer nich sien Upgaav de Scheep to stoppen. So kunnen de Galeeren vun de Russen ohn Holt bit vör de lübsche
Stadtmuer kamen.
To de Upgaven vun en Vogt hören ok besünnere Vörkamen. So harr bi en stieven Nordoostwind de Botschafter Bulsrode Whitelocke ut England na Verhandlungen mit de Königin vun Sweden in dat Johr1654 up de Trüüchreis mit de „Amarantha“ vör Tramünn de Anker smieten laten.
De Botschafter weer froh, endlich wedder fastes Land ünner de Fööt to kriegen. De Pommersche Küst kenn he nich so goot. Vun’t Schipp ut harr he Rostock mit Wismar verwesselt.
Bi de Ankunft vun de „Amarantha“ wöör vun de Zitadell Salut schaten. De Vogt, en Mann mit langen witten Bort, keem den Botschafter in de Mööt un nödig em in de Vogtei. Dor geev dat Eten un Mummenbeer ut de Braueree in de Vörreeg.
As de Botschafter denn mitkreeg, dat he allens betahlen sull, hett he sik gau mit sienen Tross up de Wiederreis na Lübeck maakt.
In Loop vun de Johr’n hebbt enen ganzen Barg Vögte in de Tramünner Vogtei ehren Deenst dahn. En dorvun hebbt de Tramünner besünners in ehr Hart slaten, den Vogt Ludwig Mollwo.
Bi sienen Amtsantritt weer de Kirch swoor verschuldt. He hett dat fardig kregen, de Kirch in sien Amtstiet vun 1735-1760 schuldenfrie to maken. Ok männich Striedereen mank de Börger vun Tramünn müsst he slichten.
Dat gung nich ümmer friedlich to. Aver sien Frohnatuur hett em dorbi holpen allens klor to kriegen. De Tramünner hebbt as Dank en Straat in de Siedlung sienen Naam geven, de Mollwostraat.
Argert hett he sik aver ümmer wedder över de Swien in de Kurgoornstraat. De Mess vun de Deerten leeg oftins in Hupen meern up de Straat.
Ludwig Mollwo hett veel Godes för Tramünn daan. Begraven is he in de Kark vun Tramünn. Up den Gravsteen stünn de folgende Spruch: „Nach hundert Jahren guter Ruh fällt dieses Grab der Kirche zu.“
Sitdem de Kark renoveert is, liggt de Gravsteen vun Ludwig Mollwo buten vör de Turmdöör.
För besünnere Begevenheiten weern de Vögte ok tostännig. So hett de Landgräfin vun Hessen-Darmstadt mit ehr dree Döchter up de Dörchreis na Petersborg in de Tramünner Vogtei Station maakt.
En vun de Döchter sull mit den Zaren verheirat warrn. För so hogen Besöök müss de Vogtei extra herricht warrn.
De dormalige Vogt Johann Zitschky harr dordörch veel to doon. In de eerste Etage hett he veer Rüüm för den hogen Besöök utstaffeert. Grote Spegel wöörn anbröcht, de Wänn wöörn mit Papiertapeten verkleed un de Footbodden mit Hoordook (Teppich) utleggt.
Gardinen müssen vör de Finster üm de Prinzessen vör de Sünn to schütten. Vör de Infohrt vun de Trav legen al de russischen Fregatten up Reede. De sull’n de Prinzessen na Petersborg bringen. To de Wiederfohrt mit Schipp müssen de Prinzessen mit en Schalup an Bord vun en Fregatt bröcht warrn.
Wenn hüüt Prinzessen in de Vogtei kemen, bruukt nix verännert warrn. Na de Renoveerung is de Vogtei in März 2007 wedder apen maakt woorn. Dat gifft dor en Gastronomie, dor kann een Beer, Wien, Kaffee un ok wat to Eten kriegen. In dat Teekontor gifft dat Tee to köpen. Aver enen Vogt, de allens regelt, gifft dat hüüt nich mehr.
Tosamenstellt vun Antje Heßler
Unser Travemünde Heft 1/377