Startseite » Platt » Platt Halfstarke in’n Tramünner Fischereehaven!

macht Platz

Halfstarke in’n Tramünner Fischereehaven!

Överall in’n Tramünner Fischereehaven kaamt di de Halfstarken in de Mööt. Un nich blots in’n Haven, ne an de hele Küüst. Se maakt groten Larm un schreet un randaleert üm de Wett. Kuum dat se Platz vör di maakt. Se sünd so driest, se pett di meist up de Fööt. Wo se langlatscht, liggt achterna n’Barg Schiet. Musst di vörsehn, dat du dor nich rinpettst. Mit ehr’n groten Snavel ramentert se mank de lerrigen Fischkisten. In’n Sturzfloog suust se över dien Kopp. De utbreedten Flünken sünd meist bit twee Meter breet. Kannst bang vör warrn, vör de twee- bit dreejährigen Mantelmöwen. Se hebbt meist de Grööt vun en lütt Goos un bannig grote Snavels. De seht dörch den Haken meist en Adlersnavel liek.

In Fischereehaven steiht en groten Schuppen. Baben up dat Dack sitt de Möven dicht neveneenanner un luurt över den Haven. Ümmer wedder landt welk up dat Dack. Dorbi flattert se mit ehr groten Flunken. Welk hebbt sik ok enen Laternenpahl as Utkiek utsöcht. In de Luft schweevt ok noch en poor „Spionen“. Kümmt en Fischkutter in Sicht, gifft dat glieks Alarm. De hele Schwarm störk sik denn mit groot Geschree up den Kutter. Aver dat gifft noch nix. De Fischresten kaamt eerst later över Bord.

Kampf ums Futter

Denn is dat endlich sowiet. De Fischer hebbt ehr’n Fang ut de Netten puult un sauber maakt. De Fischresten warrt nu in’t Water smeten. Mit groot Geschree kaamt de Möven anflagen. Se störk sik all to glieke Tiet up de Fischresten. In’t Water is en groot Balgeree. Se slaagt so dull mit de Flünken üm sik, dat dat Water richtig hochsprütt. Dat süht ut, as wenn dat Water kaakt. Dorbi jagt se sik gegensiedig de groten Happen af. Gau slingt un würgt se de Fischstücken hindaal.

Schar Möwen

Bald weer keen Happen mehr dor, allens weer verswunnen. De Möven flogen in de Luft un kreisten över de neegsten Fischkutter. Söchen denn wedder ehr’n Utkiek up un leggen sik up de Luur. So’n poor ganz freche Halfstarke möken sik an en Fischkist. De frischen Fisch legen fien neveneenanner in de Kist. Aver dor keem de Fischer un hett de frechen Möwen gau verjagt.

junge Mantelmöwe

Ditt Speelwark kannst in de Hauptsaak bi uns in de Wintertied bekieken. Meisttiets sünd dat de twee- bit dreejährigen Mantelmöwen, de sik dor rümdrievt. Utmaken kannst se an ehr gries Fedderkleed. De Öllern sünd gröötstendeels al na’n Noorden ünnerwegens. De sünd witt mit düstergraue Flünken un enen gelen Snavel mit roden Punkt. An de Küsten vun dat Noordmeer söök se sik Placken to’n Nestbu ut. Aver de Halfstarken, de jungen Mantelmöwen, sünd noch immer in’n Fischereehaven antodrapen.

Text und Fotos: Antje Heßler
Unser Travemünde, 2010, Heft 1/342

zurück zur Übersichtsseite Platt