Startseite » Platt » Platt Kohl-Lauch in’n Zippelpark!

Gedenktafel Dr. med. Hermann Zippel

Kohl-Lauch in’n Zippelpark!

In Tramünn gifft dat enen Zippelpark. Dat is en feuchte Wiesch twischen Binnen- un Außenallee vör den Tennisplatz. Op düsse Wiesch kann man övert Johr verdeelt bit to dörtig verscheden Planten un Bloom bekieken. De Anblick lohnt dat ganze Johr. Den Naam Zippelpark hett de Wiesch na Dr. Zippel kregen. He hett sik as Dokter in Tramünn besünners verdeent maakt.

Al in’t Fröhjohr blöht de smucke Saffran in vele Farven (Krokus). Dorna kaamt de gelen Zittlööschen (Narzissen). De Lüüd snackt direktemaang vun de „Narzissenwiese“. Besünners smuck is ok de bunte Sommerwiesch. Mank hoge Gräser weegt sik selten Bloom in’n Wind. Eerst in den Augustmaand warrt de Wiesch meiht. So köönt sik de Zippeln vun de Blööm verhalen un Knööv för dat neegst Johr kriegen. Dat is en wichtigen Bidrag för den Natuurschutz. In’n Harvst smückt denn nochmal de Zittlöösch (Herbstzeitlose) de Wiesch mit zartlila Blöden.

To geern föhr ik mit Fohrrad in den Heumaand na den Zippelpark. Dor staht noch de hogen Gräser. Sünst is al överall dat Gras afmeiht. Mank de verscheden Gräser wasst dat Wiesenlabkruut un dükert de Wiesch in witten Schuum. Luder dunkelrode runde Kugeln up langen dünnen Stengel ünnerbreekt den witten Schuum. Ut de Neegde weern de düsterroden Kugeln luder lütte Blöden. De Blööm müss ik wat neger ünnersöken, de müssen mit na Huus. Neven en upblöhte Bloom stünn ok noch en Knuppen. De müss ok mit.

Zippelpark

Bi’t Plücken vun de Blööm steeg mi en lichten Ruuch na Lauch in de Nees. To de Blomen kemen noch en poor Stengel vun dat Wiesenlabkruut un en poor Gräser. Mien Blomenstruß weer trecht un smück mienen Disch.

Stein Dr. ZippelparkTo Huus heff ik denn rutkregen, dat de düsterrode Bloom en Kohl-Lauch ok Gemüse-Lauch oder Ross-Lauch weer. Vör de Blöhtiet kann man de halvrunden Bläder as Smack to Soßen bigeven. In Süüd- un Middeleuropa warrt noch hüüt de Schlangen-Lauch, en negen Verwandten vun den Kohl-Lauch, as Würzplant anbuut.

In en Gemüsebook vun 1857 kann man lesen: „Es ist dies eine dem Knoblauch verwandte Art von ähnlichem, aber schwächeren, angenehmen Geschmack…“

Blööt mit BrutzibbelnDe Kohl-Lauch is en krutig Plant un warrt bit to 70 cm hoch. Se bildt en oder mehr eiförmig Zibbeln ut. De Stengel is hart un stief un an’t Enn is en Scheindolde. An den Stengel sitt lütte Bläder de bald verdröögt. Rifft man de Bläder mank de Finger, rüükt se licht na Knuuflook. Mank de enkelten lütten Blöden, de Glocken liek seht, wasst düsterrode Brutzibbeln. De Kohl-Lauch blöht twischen Juni un August.

In den Zippelpark weern de düsterroden Blödenköpp mank de verscheden Gräser un dat Wiesenlabkruut nich to översehn. De Zippelpark hett nich blots wegen Dr.Zippel, ok wegen all de Zippeln in de Eer to Recht sien Naam kregen.

Text und Fotos: Antje Heßler
Unser Travemünde, 2011, Heft 4/348

zurück zur Übersichtsseite Platt