Pottblomen!
Dat is nu wedder so wiet. In uns Wahnung sind de Blomenpütt mit Primeln, Tulpen, Narzissen un Hyazinthen an de Reeg. In de Goornereen lüücht överall bunte Blomen. En söten Ruuch, de meist swiemelig maakt, kümmt uns ut de Drievhüser in de Mööt. Dannenbööm, Dannengröön un Wiehnachtssteerns hebbt utdeent. Up de Finsterbänk staht blöhende Pottblomen.
Dor keem bi uns de Fraag up, sietwann gifft dat egentlich Pottblomen? Planten in en Pott groot trocken hebbt al de olen Ägypter. Ok vun de Griechen un Römer weet man, dat se Lorbeerbööm in irdene Pött plant un tücht hebbt. In de Gegend weer dat dorför buten ok warm noog.
Bi uns in Westeuropa hett dat bit twüschen dat 17. un 18. Johrhunnert duert. Dor eerst geev dat en Heizsystem. Dat kunnen sik aver blot höfische un rieke Privatlüüd leisten. Vun de Tiet an geev dat ok ut ferne Länner Pottblomen in de Orangerien un botanische Goorns.
De eenfachen Lüüd müssen noch lang töven. Nich jeder harr en Aven. In de kole Johrestiet weern de Pottblomen ganz eenfach verfroren. Eerst üm 1900 füng dat mit de de Pottplanten an. Un de Planten müssen ok noch Avenluft verdrägen. Orchideen weern mit Sekerheit noch nich dorbi. Farne un Efeu weern wull de eersten Planten, de in de mit Aven beheizten zugigen Rüüme wassen kunnen. Denn kemen Begonien, Azaleen, Fuchsien un ok Alpenveilchen dorto. Geev dat aver in Winter grote Küll, müssen de Planten, de vör dat Finster stünnen, mit Zeitung afdeckt warrn oder se wöörn meern in de Stuuv up den Disch stellt.Dat weer intwischen grote Mood, sik de Wahnstuuv mit Gröönplanten un Blomen to smücken.
Siet dat meist överall Zentralheizung in de Hüser un Wahnungen gifft, de Finsterfronten gröter sind, is de Tall un de Oort vun Pottblomen ümmer gröter woorn. För jeden Ruum gifft dat en Plant. De Luftfeuchtigkeit is dörch Damp un Dusch gröter. So köönt hüüt ok tropische Planten, wi Orchideen, Bromelien un vele annere Bloom, goot gedeihen. De Pottbloom hett ehr’n Siegeszug antreden. Se dräägt sogor to Luftverbeterung dat heet to unse Gesundheit bi.
Text und Fotos: Antje Heßler
Unser Travemünde, 2013, Heft 1/353