Startseite » Platt » Platt Swatte Gesellen!

Kormorane Swatte Gesellen

Swatte Gesellen!

Up den Anlegger in’n Tramünner Fischereehaven stünnen se, uprecht un groot, twee swatte Gesell’n! Se keken mi mit smaragdgröön Ogen an. Ehr Fedderkleed glänz as Metall. De groten, vörn na ünnen bagen Snavel, wiesen na mi. Kunnst meist bang vör warrn. So ut de Neegde harr ik se noch nie sehn. Dat weern Kormorane.

Düssen Winter harrn de swatten Gesellen dat besünners swoor. De Trav weer deelwies to mit Ies. Se seten in’n Fischereehaven up de Iesschollen oder up de Brüchen. Leten mi dicht an sik ran. Ik kunn se goot knipsen. Se kunnen dörch dat Ies nich na Fisch dükern. Lungern dorüm mit anner Watervagels bi de Fischkutter na Fisch.

twee Kormorane

Kennen do ik düsse swatten Gesellen al lang. Ümmer wedder hebbt se mien Upmarken up sik trocken. Düt Johr sünd se sogoor vun de Nabu as „Vogel des Jahres 2010“ utsöcht woorn. Stolt binah vörnehm staht se meist up de Brüchen oder de Poller an’t Water. Luurt mit ehr gröön Ogen na Fisch. Warrt se enen gewohr, breed se ehr groten Flünken ut un störkt sik in’t Water. Na’n ganzen Stoot kaamt se mit en Fisch in’n Snavel wedder to’n Vörschien. Den helen Fisch würgt se den langen Hals hindaal. Kunnst tokieken, wo he graad steken deiht. Harrn se noog Fisch fungen, stünnen se wedder up de Poller oder de Brüch. Breden ehr groten Flünken to’n Drögen wiet uteenanner. Dat sehg besünners smuck ut. Kunnst meist an en Aadler dinken.

Dat eerst Mal sehn heff ik welk vun düsse swatten Gesellen in de söventiger Johrn. Wi schippern mit uns Boot na Niendörp. Dor seten welk up de Pahls, nehm de Fischer ehr Netten utleggt harrn un luurn na Fisch. Vull Höög hebbt wi to Huus vun uns Beobachten vertellt. Korte Tiet dorna sünd wi denn de eersten Kormorane up en Badesteeg in Tramünn wies woorn. Ümmer weer uns Freud groot, wedder de swatten Gesellen to sehn.

Kormorane keen Platz frie

Vele Johrn sünd in’t Land gahn. De Kormorane hebbt bannig tonahmen. In Fischereehaven luurt meist up jedeen Poller en swatten Gesell. Kaamt de Fischkutter mit Fisch in den Haven, fallt se över den Bifang un Affall her. Geihst du hüüt de Promenaad lang, kannst du bit to hunnert swatte Gesellen up de Badbrüch tellen. In en lang Reeg sitt se up dat Gelänner un de Planken. Dor is keen Placken mehr frie. All luurt se up Fisch. Welk dröögt ok ehr Fedderkleed.

Sühst du de velen Kormorane, de all na Fisch luurt, kannst du de Bang vun de Fischer üm den Fischbestand begriepen. För mi is de Kormoran aver liekers ümmer wedder en besünners intressanten un smucken Vagel. To geern harr ik mi mal so en Bruutkolonie ankeken. Aver de liggt swoor togänglich an den Dassower See in en Natuurschutzgebiet. Vun Wieden kunnen wi de mit Koot beklackerten witten Bööm utmaken. Leider kunnen wi dor nich hin.

Text und Fotos: Antje Heßler
Unser Travemünde, 2010, Heft 2/342

zurück zur Übersichtsseite Platt