Startseite » Platt » Platt Unkruut! Mahnbloom – Bloom vun 2017

Mohn

Unkruut!
Mahnbloom – Bloom vun 2017

Wat is egentlich Unkruut?
Dat is för jedeen wat Anners. För mennigeen sind dat Krüder, sogoor Heelkrüder. För denn annern sünd dat Planten, de sik mank sien anseit Saatgoot breet maakt un stöört. De tüchten Planten ut dat utseit Saatgoot hebbt so nich noog Ruum to’n Wassen.

Ween stöört nich de Giersch in dat Blomenbeet oder de velen Boddersteker in den Rasen? Ok de Brennetteln tellt bi de meersten Minschen to dat Unkruut. Dorbi warrt all düsse Planten hüüt un ok al fröher as Salat up den Disch brööcht. Veel so nöömte „Unkrüder“ warrt dröögt un Tee dorvun kaakt. Man snackt sogoor vun ehr Heelkraft. Vun dat smuck Utsehn ganz to swiegen!

To dütt Unkruut- Ackerkrüder- tellt ok de Mahnbloom un maakt de Buurn to schaffen. Se harrn bi de Utsaat un de Fruchtfolge Probleme. Mittel gegen dat Unkruut, „Herbiziden“ wöörn insett. Dat güng sowiet, dat de Ackerunkrüder meist all vernicht wöörn.

Mohn

Mahnbloom, Roggenbloom, Kamille un wi se all heet geev dat nich mehr veel. De Immen funnen nich noog Foder. Dor hett de Loki-Schmidt-Stiftung beslaten, de Mahnbloom to schütten un to Bloom vun dat Johr 2017 to wählen.

All düsse Planten sünd keen Unkruut, sünnern Bikruut un keen Düvelstüüg. För de Insekten un anner Deerten sünd se bannig wichtig. Dat ganze Ökosystem weer stöört. De Landwirtschaft hett dor al siet 1980 en Ackerrandstriepen-Programm inföhrt. De Buurn müssen gegen en Entschädigung toseggen, den Ackerrandtstriepen nich mehr mit Plantenschutzmittel to behanneln.

Mohn

Text und Fotos: Antje Heßler
Unser Travemünde, 2017, Heft 3/371

zurück zur Übersichtsseite Platt