Startseite » Platt » Platt Vörbi!

Vörbi

Vörbi!

Noch töövt de Dannenbööm up den schöönsten Dag, up Heilig Avend. Aver bald is dat wedder vörbi! Denn hebbt Dannenbööm un Dannengröön utdeent.
De Dannenbööm liegt denn an’n Stratenrand un töövt up den Müllslucker.

Dat is meist so, as in dat Märken vun Hans Christian Andersen. Dor röppt de lütt Dannenboom: „Vörbi! Vörbi!“

FichteButen is dat grau in grau. Dat will gor nich richtig hell warrn.
De Minschen köönt de Tiet nich aftöven un haalt sik Fröhblöher in’t Huus.
De smückt de Finsterbänk in alle Farven. Dat is de reinste Farvenrausch.

In jeden Blomenladen kannst de bunten Blööm köpen. Primeln, Tulpen, Narzissen un Hyazinthen blööt üm de Wett. De mehrsten sünd in Pütt in de Drievhüser vörtrocken.

Kümmst in so’n Drievhuus, büst vun den starken söötlichen Ruuch meist benüsselt.

VörbiDenn duurt dat nich mehr lang un de Oosterhasen sünd wedder an de Reeg.

So geiht dat Johr för Johr.

De Wiehnachtsbööm warrt vun Müllkontainer afhalt, de Boomsmuck kümmt wedder in de Pappkartons un wi töövt up dat neegst Wiehnachtsfest.

Allens is eenmal vörbi un dat hett allens sien Tiet.

Fensterbrett mit Fröhblöher

Text und Fotos: Antje Heßler
Unser Travemünde, 2015, Heft 1/361

zurück zur Übersichtsseite Platt